Tuesday, May 19, 2015

छाक कटाएर शरणार्थीले गरे भूकम्प पीडितलाई सहयोग


कुमार लुइँटेल

हुनेले समेत सहयोग गर्न हिच्कीचाएको र मुठ्ठी कसेको बेला ‘केही नभएका र अर्काको देशमा शरण लिएर बसेका’ भनिने भुटानी शरणार्थीले छाक कटाएरै उदार मनले नेपालका भूकम्प पीडितलाई सहयोग गरेका छन् ।

छाप्रोको बास छ । आफै दाताले दिने खाद्यान्नको भरमा छन् । जीवन गरिबी र अभाव बितिरहेको छ । उनीहरुको निरासाको फेहरिस्त निकै लामो छ । तर, तमाम समस्यालाई चिर्दै शरणार्थीले छाक कटाएरै भएपनि भूकम्प पीडितको लागि सहयोग जुटाएका छन् । यो काममा शरणार्थीका अगुवा र युवाले सक्रियता देखाएका हुन् । झापा र मोरङका शिविरहरुबाट उठाइएको खाद्यान्न सिन्धुलीका भूकम्प पीडितसम्म पु¥याइएको छ । ‘आफूलाई आश्रय दिने देशमा परेको विपद्लाई आफ्नै सम्झदै सहयोग गरेका हौं’,झापा दमकस्थित बेलडाँगी शिविरका सचिव सञ्चहाङ सुब्बाले भने,‘हरेक छाप्राबाट एक छाकको चामल, तेल, नुुन, बेसार,
हरियो सब्जी आदि खाद्यान्न संकलन ग¥यौं । सक्नेले नगद पनि सहयोग गर्नुभयो ।’


शरणार्थीहरु २५ वर्षदेखि नेपालमा शरणागत छन् । नब्बे हजार जति तेस्रो देशमा पुर्नवासका लागि गइसकेका छन् । तर, यहाँ हुनेले अभावबीच सहयोग गरिरहेको शरणार्थी अगुवा टिकाराम रसाइलीले बताए । उनले भने,‘विदेशमा भएकाले पनि सहयोग गरिरहनु भएको छ ।’ 

झापाको दमकस्थित बेलडाँगी र मोरङको शनिश्चरे शिविरका शरणार्थीले एकछाक खाना बराबरको सहयोग गरेका हुन् । उनीहरुलाई विश्व खाद्य कार्यक्रमले दुई साताका लागि प्रतिव्यक्ति ५ केजी ६ सय ग्राम चामल दिन्छ । अन्य खाद्यान्न पनि उपलब्ध हुन्छ । रसाइली भन्छन्,‘सहयोग दिन कसैले सानो मन गर्नुभएन बरु हामीले सोचेभन्दा धेरै जुट्यो ।’ 

शिविरहरुमा पाँच दिन लगाएर संकलन गरेको खाद्यान्न एउटा बस र ट्रकमा लिएर शरणार्थीको २२ सदस्यीय टोली सिन्धुली पुगेको छ । जिल्ला प्रशासन कार्यालय झापाको स्वीकृति र सल्लाहबमोजिम यो टोली सिन्धुली पुगेको हो । शनिश्चरे शिविर सचिव चम्पासिंह राईले भने,‘हामी अभावै अभावमा छौं तर राष्ट्रिय विपद्को यो समयमा हामीले पनि केही गर्नुपर्छ भन्ने लागेर नै सहयोग गर्न तम्सिएका हौं ।’

Monday, May 18, 2015

भूकम्पको शोकमा नेताको शान, बालिकाको सहयोगी मन


आफ्नो गुन्यूचोलीको भोज रोकेर भूकम्प पीडितलाई एक लाख दिने ९ वर्षीया यशस्वी पोखरेल र उनकाे परिवार। - See more at: http://annapurnapost.com/News.aspx/story/11882#sthash.pi2MvYcb.dpuf

आफ्नो गुन्यूचोलीको भोज रोकेर भूकम्प पीडितलाई एक लाख दिने ९ वर्षीया यशस्वी पोखरेल र उनकाे परिवार। - See more at: http://annapurnapost.com/News.aspx/story/11882#sthash.pi2MvYcb.dpuf
कुमार लुँइटेल
कुमार लुँइटेल
विराटनगर : विनाशकारी भूकम्पले सिंगै मुलुक नै शोकमा डुबेका बेला राष्ट्रिय स्तरका एकजना नेताले गरेको भव्य बिहे भोज एकजनाले सर्वसाधरण बालिकाले गुन्यूचोली लागि छुट्टाएको एक लाख भूकम्पपीडितलाई दिएको दुई फरक प्रसंग अहिले विराटनगरमा निकै चर्चामा छन्। 
 मधेशी जनअधिकार फोरम नेपालका अध्यक्ष उपेन्द्र यादवले भूकम्पको शोकका बेला आयोजना गरेको छोराको बिहे भोजको आलोचना भइरहँदा विराटनगरकी वर्षीया यशस्वी पोखरेलले आफ्नो गुन्यूचोली पार्टी रोकेर एक लाख रकम भूकम्प पीडितलाई दिएकी छिन्। भूकम्पको शोकमा नेताको देखाएको शान बालिकाको सहयोगी मन यहाँका टोलटोल घरघरमा अहिले चर्चा भइरहेको छ। यशस्वीले सबैबाट स्याबासी पाएकी छन्। 

गुन्यूचोली कर्मपछि भोजका लागि छुट्टाइएको एक लाख बालिकाले आइतबार जिल्ला प्रशासन कार्यलय मोरङमार्फत भूकम्पपीडितलाई दिएकी हुन् आइतबार गुन्यूचोलीको भोज गर्ने कार्यक्रम थियो तर बालिकाकै इच्छामा भोज स्थगित गरेर भूकम्पपीडितलाई दिइएको हो  
 गुन्यूचोलीको भोज रोकेर बालिकाले दिइन् भूकम्पपीडितलाई एक लाख
यादवले वैशाख २९ गते आफ्ना छोराको विवाह धुमधामसँग गरे। विराटनगरमा विवाह भोज पनि उस्तै तामझामसाथ भयो गाडी आगन्तुकको लावालस्कर नै लागेको थियो मुलुक महाविपद्मा परेको बेला भएको विवाह भोजको निकै टिकाटिप्पणी पनि भयो।
यादवले महाभूकम्पको विपद्मा परेका पीडितलाई छोराको नाममा एकसुका पनि दिएनन् तर विराटनगर की वर्षीया यशस्वी पोखरेलले भने उदाहरण प्रस्तुत गर्दै आफ्नो गुन्यूचोली कर्मपछि आयोजना हुने भोजमा खर्च गर्न ठिक्क पारेको सबै रकम भूकम्प पीडितलाई सहयोग गरेकी छिन् यादवले महाविपद्को बेला तामझामका साथ छोराको विवाह भोज गरेको विषयमा विराटनगरको सामाजिक वृतमा आलोचना भइरहँदा यशस्वीले भने स्याबासी पाइरहेकी छिन्।

Monday, May 11, 2015

बिहारका विधायक छुटे, जोगबनीका मेयरलाई दश वर्ष जेल



कुमार लुइँटेल
विराटनगर : विराटनगरका व्यापारी तुलसीराम अग्रवाल अपहरण काण्डका आरोपित भारतको बिहार राज्य विधान सभाका विधायक जाकिर हुसेन खानलाई मोरङ जिल्ला अदालतले सफाइ दिएको छ।

जीउ मास्ने बेच्ने मुद्दामा कसुरदार नरहेको र निर्दोष भएको ठहर गर्दै सफाई दिएको हो। खान बिहारको अररिया जिल्लाबाट बिहार विधान सभामा जनता दल युनाईटेडका निर्वाचित विधायक हुन् । मोरङ जिल्ला अदालतका मुख्य न्यायधीश शेखर पौडेलको इजलासले हुसेनलाई सफाई दिएको हो।

अर्का आरोपित भोलाशंकर तिवारीलाई भने दश वर्ष जेल सजायको फैसला भएको छ । तिवारी भारतको जोगबनी नगरपालिकाका पूर्व मेयर हुन् । उनी सिन्धुली कारागारमा पुर्पक्षका लागि अढाई वर्षदेखि थुनामा छन्। घटनामा संलग्न भारत सहर्षाका पप्पु देव भूमिहार सर्वोच्च अदालतले २०७१ पुस २८ गते गरेको फैसलाबाट दश वर्षका लागि जेल भुक्तान गरिरहेका छन्।


हुसेन विगत अढाई वर्षदेखि तारेखमा रही अदालतमा हाजीर भइरहेका थिए । अदालतले निर्दोष रहेको फैसला गरेपछि हुसेनले भने,‘म अदालतको न्यायको सम्मान गर्दछु । अपहरण कान्डमा मेरो कुनै संलग्नता नरहेको सम्मानित अदालतबाट फैसला भएको छ। यो अत्यन्तै स्वागतयोग्य छ।'

व्यापारी तुलसीराम अग्रवाल अपहरण काण्ड

 यो अवधिमा आफूले हप्तामा एक पटकसम्म बिहारको राजधानीबाट विराटनगर अदालतको तारेखमा आएको, सदनमा सपथग्रहणका बेला तारेख पर्दा त्यो अवसरसमेत छाडेको र श्रीमती बिरामी पर्दा पनि अदालतको मान राख्दै उपस्थित भएको बताए ।‘विधि र कानुन मिच्दै मैले कसैको अपहरण गर्ने कुरै थिएन,’ उनले भने,‘मेरो कुनै संलग्नता नरहेको भन्ने फैसलाबाट पुष्टि भएको छ । म सन्तुष्ट छु । अब राजनीतिक जीवनमा म माथि कुनै दाग छैन् ।'

Tuesday, December 16, 2014

नेता पनि लागे कृषि कर्ममा

कुमार लुइँटेल
विराटनगर : एमाओवादी मोरङका अध्यक्ष गोपी अछामीले पोखरीबाट भर्खरै निकालेको माछा फटाफट तराजुमा राखे। कुनकुन प्रजातिका झिकिएका रहेछन्, ध्यान दिएर हेरे। अनि तौल घटी त भएन भन्दै सहयोगीलाई सोधे। तराजुको काँटाले उचित तौलको संकेत दियो। प्लास्टिकमा पोको पारेर ग्राहकको हातमा माछा राखिदिए। अछामीले भने, '६ महिना भयो, कृषि फर्म सुरु गरेको। एक रुपैयाँ गोटा खरिद गरी पोखरीमा छाडेका भुरा अहिले दुई सय ५० रुपैयाँका भएछन्।' 
 
कोसीहरैंचामा एमाओवादीका जिल्लास्तरका नेताहरू न्यु संयुक्त कृषक फर्म खोली व्यवसायमा लागेका हुन्। 'कोरा दर्शन र सिद्धान्तले मात्र राजनीतिक जीवन चलाउन कठिन हुनेरहेछ' अछामीले भने, 'कृषि उद्यकमा लागि उत्पादन र व्यवसायसँगै राजनीति पनि गर्दैछु। अरू साथी पनि साथै हुनुहुन्छ।'
एमाओवादीका २२ जना स्थानीय नेता तथा कार्यकर्ताले ४० लाख रुपैयाँ लगानी गरी पचाममा फर्म सुरु गरिएको अछामीले बताएका छन्। फर्ममा बंगुर, भैंसी, गाई र बँदेलपालन पनि गरिएको छ। फर्मका अध्यक्ष तथा कोसी हरैंचानगरका पार्टी इन्चार्ज नवराज चापागाईं भन्छन्, 'माछाको बिक्री सुरु भइसक्यो। अब बंगुर पनि बजार लग्ने तर्खरमा छौं।' यो फर्मबाट अहिले दैनिक एक सय केजीसम्म माछा उत्पादन भइरहेको उनले बताए। 
 
एमाओवादीका मात्र नभएर मोरङमा अन्य दलका नेता पनि राजनीतिका लागि आर्थिक रूपमा आत्मनिर्भर हुने अभियानमा सक्रिय भएका छन्। कतिले व्यावसायिक कृषि फर्म खोलेका छन्, कतिपय पशुपालनमा सक्रिय भएका छन्। 
मोरङमा एमाओवादीका सभासद् शिवकुमार मण्डल, अमनलाल मोदीसहित नेताहरू नवीन पोख्रेल, प्रकाश पौडेल, खेमराज भट्टराई कुखुरा, बाख्रा, गाईपालन र अन्य कृषि कर्ममा होमिएका छन्। मण्डलले मोरङको दर्वेशा २ मा १५ बिघा जग्गा भाडामा लिएर सातवटा पोखरीमा माछापालन गरिरहेका छन्। 

Saturday, August 16, 2014

चरा धपाउन एम्बुलेन्स !




विराटनगर : शनिबार दिउँसो डेढ बजे विराटनगर विमानस्थलको रनवेमा एउटा एम्बुलेन्स साइरन बजाउँदै तीव्र गतिमा दौडियो। पूर्वप्रधानमन्त्री शेरबहादुर देउवालाई स्वागत गर्न विशिष्ट कक्षबाहिर बसेका कांग्रेस कार्यकर्ताले मुखामुख गरे।
ठूलै आपत् आइपरेको हो कि भनी उनीहरू अड्कल गर्दै थिए तर एकै छिनमा थाहा भयो, त्यो एम्बुलेन्स बिरामी बोक्न वा घाइते लिन नभएर विमानस्थलमा चरा धपाउन दौडिएको पो रहेछ। कांग्रेस सभासद् तथा पार्टीका मोरङ अध्यक्ष अमृत अर्यालले भने, 'साइरन बजाउँदै एम्बुलेन्स त चरा धपाउन पो दौडिएको रहेछ।'
विराटनगर विमानस्थलमा नागरिक उड्डयन प्राधिकरणको एउटा एम्बुलेन्स चरा धपाउन सधैं त्यहाँ तैनाथ हुन्छ। हवाईजहाज उड्नु र अवतरण गर्नुअघि एम्बुलेन्सलाई तीव्र गतिमा दौडाएर रनवेतर्फ लगिन्छ। त्यसलगत्तै जहाज अवतरण र उडान गर्छन्। विमानस्थलमा बारम्बार चरा ठोक्किएर क्षति हुने र दुर्घटनाको सम्भावना बढेपछि उड्डयन प्राधिकरणले चरा धपाउनकै लागि एउटा एम्बुलेन्स ढुक्‍कैसँग परिचालन गरेको हो।

Monday, August 11, 2014

चार पदका लागि सत्र संगठनको माग



कुमार लुइँटेल

विराटनगर : चार पदमा शिक्षकका १७ वटा पेसागत संघसंगठनले भाग मागेपछि मोरङमा जिल्ला शिक्षा समिति नै गठन हुनसकेको छैन। पेसागत संगठनहरूबाट को प्रतिनिधि हुने भन्‍नेमा अन्योल भएकाले पनि समिति गठन हुन विलम्ब भइरहेको छ।

समिति गठन गर्न जिल्ला शिक्षा कार्यालय मोरङले असार महिनायता मात्रै आठवटा बैठक गरिसकेको छ। तर समितिमा रहने शिक्षकतर्फका चारजना सदस्यमा सबै संगठनले भाग मागेको जिल्ला शिक्षा अधिकारी राजकुमार थापाले बताए। उनले भने, 'असारमा म आएदेखि आठवटा बैठक गरिसकें तर सबैले पद मागेपछि समिति गठन नै भएको छैन।'

कार्यालयले मंसिर महिनायता समिति गठन गर्न प्रयास गरिरहेको छ। समितिका एकजना सदस्य नेपाल शिक्षक युनियनका अध्यक्ष पितकुमार श्रेष्‍ठले उमेर हदबन्दीका कारण अवकाश पाएका छन्। मोरङमा युनियन अधिवेशनसमेत भएको छैन। त्यो संगठनबाट नयाँ नेतृत्व चयन नहुँदा शिक्षा समितिमा जाने सदस्यबारे अन्योल छ। दुई महिलासहित बाँकी चारवटा पदमा शिक्षकका संघसंगठनले आआफ्नो दाबी प्रस्तुत गरिरहेका छन्।

Saturday, August 2, 2014

भेडेटारमा पनि लामखुट्टेकाे सकस


कुमार लुइँटेल
विराटनगर : विराटनगरबाट भेडेटार घुम्न गएका सञ्चारकर्मी उद्धव घिमिरे त्यहाँ लामखुट्टे देख्दा छक्क परे। मधेसको उखर्माउलो गर्मी र लामखुट्टेको सकसबाट एक दिन भए पनि मुक्त हुने लालसा लिएर उनी पहाड उक्लिएका थिए। तर त्यहाँ पनि लामखुट्टे लागेपछि घिमिरेले भने, 'होटेलमा सुतेको थिएँ। तराईमा जस्तै भुनुनुनु गरेको आवाज सुनियो। कोठामा त लामखुट्टेको गोलो रहेछ। टोक्न थालेपछि होटेल सञ्चालकसँग गुनासो गर्दै औषधि छर्किदिन आग्रह गरें।'